ELKARTEA

17 Ira 2026

Portugaletek eta El Corte Inglesek hartuko dute arraun denboraldiko amaiera handia

Portugaleteko urak izango dira protagonista igande honetan LVI GP - LII El Corte Ingles - Portugaleteko Udalaren Banderaren eta play-offen lehiarekin. 

Portugaleteko Udalean LVI GP - LII El Corte Inglés - Portugaleteko Udalaren Banderaren eta play-offen aurkezpen-ekitaldia egin da gaur eguerdian. Ekitaldian Mª José Blanco hiriko alkateak, Borja Rodrigo ACTko presidenteak eta Carmelo Lezana Euskadiko El Corte Ingléseko Komunikazio eta Erakunde Harremanen arduradunak hartu dute parte, eta hitzordu enblematiko honek traineru lehiaketaren ohiko urrezko amaiera gisa duen garrantzia nabarmendu dute.

Borja Rodrigok ireki du hitzartzeen txanda, bai Udalari bai El Corte Inglési emandako etengabeko laguntzagatik eskerrak emateko. ACTko arduradun nagusiak ekitaldiaren balio enblematikoa azpimarratu du, gizonezkoen egutegiaren amaiera ezin hobea dela eta 2027ari begira Eusko Label Liga eta Euskotren Ligaren osaketak bideratuta geratzen diren une erabakigarria dela nabarmenduz. Halaber, Portugaleteko estropada eremua balioan jarri du, ingurunearen edertasuna eta zaleek beti izaten duten harrera bikaina azpimarratuz.

Carmelo Lezanak, El Corte Inglések Euskadin duen Komunikazio eta Erakunde Harremanen zuzendariak, hitzordu honen balio historikoa azpimarratu du: "Gure banderak 52. edizioa betetzen du aurten. Mende erdi baino gehiagoko bizitza duen estropada bat da, urtez urte estropada-eremu paregabe batean ospatzen dena eta denboraldi zirraragarri bati urrezko amaiera jartzen diona. Elementu konbinazio perfektu horrekin ez da harritzekoa mende erdi baino gehiagoz El Corte Inglés - Portugaleteko Udala banderara hurbiltzen diren ehunka zaleek hiria arraunaren festa handiaren epizentro bihurtzea".

Bestalde, Mª José Blanco Portugaleteko alkateak Udalaren poza nabarmendu du traineruen egutegiko zita historikoa berriro hartzeagatik. "Portugaleterentzat harrotasuna da, beste urte batez, ACTko denboraldi amaiera handiaren eszenatokia izatea. Azken bandera hau gure nortasunaren eta gure itsas tradizioaren parte da, eta lehen mailako kirol-jardunaldi batez gozatzeko aukera ematen digu gure kaleak eta itsasertza betetzen dituzten milaka zaleekin batera", adierazi du.

Alkateak Udalaren, El Corte Inglésen eta ACTren arteko lankidetza balioan jarri du "Portugaleteko historiaren eta orainaldiaren parte den" lehiaketa bat bizirik mantentzeko. Halaber, herritarrak eta hirira hurbiltzen direnak gonbidatu ditu kirol-ikuskizunaz gain "Portugalete, gure itsasadarra eta ekitaldi handiak hartzeko gure gaitasuna erakusteko aukera bikaina den" jardunaldi batez gozatzera.
 

Itzuli