ACT TV 2018

ENTREVISTAS

31 Xan 2018

"Temos factores para gozar do melhor remo"

"Temos factores para gozar do melhor remo"

Borja Rodrigo fai un repaso nesta entrevista para ACT TV e amósase optimista co futuro da máxima competición

Borja Rodrigo acaba de facer un ano á frente da ACT e cóntanos nesta entrevista a ACT TV como viviu este intenso ano e, sobre todo, cara onde vai o futuro máis próximo da máxima competición de remo. “Foi un ano intenso, mais visto o resultado final, sen dúbida gratificante xa que o balanzo ten sido moi positivo”, explica o máximo mandatario da Asociación. “A ACT é un produto consolidado, pero así que estás dentro é cando es consciente da envergadura que ten”, sinala Rodrigo.

A respecto dos dous descensos deste ano, apunta que “dá moita mágoa a marcha dun dos nosos socios fundadores, un histórico como Astillero. Ademais, este descenso implica perder a representación cántabra, ogallá pronto voltemos ter o remo cántabro no primeiro nivel”. E sobre o adeus da ‘Santa Olalla’ salienta que “Ares é un club que nos gañou o corazón a todos e que foi quen de pelexar cara a cara contra os mellores con uns recursos moi limitados”. Sobre as altas, ten claro a importancia dos proxectos de Donostiarra e Santurtzi Iberdrola. “Son dous proxectos que do punto de vista deportivo van dar que falar e dámoslles a benvida”, afirma. Outras dúas ‘altas’, neste caso na Xunta Directiva, son as de Igon Lertxundi e Txema Vizcaíno, que se unen a Mario Vidal, apuntando que “estou seguro de que vamos estar á altura da ACT”.

Sobre os planos máis inmediatos da Asociación, un dos puntos salientábeis é o acordo entre a AEPSAD e a ACT. “A entrada da Axencia Estatal, xunto coa AVA e os nosos recursos propios, vainos permitir aumentar a capacidade da ACT para detectar os casos de positivo. E sen dúbida que coa introdución do pasaporte biolóxico, e outros desenvolvementos normativos propios, poráselle moi difícil a quen queira infrinxir a lei”, asevera Rodrigo. Outros dos temas tratados son o do traballo conxunto coa LGT e a ARC. “Por parte da ACT non hai outra intención que a de estar o máis perto posible das súas ligas filiais para entre todos consolidar o remo do Atlántico á Francia”, sentenza.

O remo feminino, da man da Liga Euskotren, é unha aposta que a ACT iniciou de forma pioneira hai máis de 10 anos e o desexo é seguir con ela. “O remo feminino está indo a máis e a ACT ten que estar na punta de lanza e seguir promovendo e ampliando o espazo do remo feminino. Vamos desenvolver no curto prazo ideas e accións encaminadas a dotar de maior estabilidade o remo feminino”, explica Rodrigo. E por último, o máximo mandatario da ACT amósase optimista de cara ao futuro máis próximo. “Non temos máis que factores positivos, e ben xestionados, farannos gozar un ano máis do mellor espectáculo no mundo do remo”, conclúe Borja Rodrigo. 

Voltar