LEHIAKETA

01 Abu 2024

Igandean jokatuko dira Orio Kanpina banderak

Abuztuaren 4an, igandearekin, Orion jokatuko dira Eusko Label Ligako eta Euskotren Ligako 12. jardunaldiak, Orio Kanpina XII. banderak. Estropada-eremua iazko bera izango da: Orioko kanpoko barraren aurretik abiatu eta Mollarri aldera. 

Euskotren Ligako emakumezkoen proba 11:25ean abiatuko da, eta zortzi traineruk hartuko dute parte: Orio Orialki, Donostia Arraun Lagunak, Nortindal Donostiarra, Tolosaldea Arraun Kluba, Hondarribia Bertako Igogailuak, Hibaika jamones Ancin, CR Cabo da Cruz eta SD Tirán Pereira. 1,5 itsas-milia egin beharko dituzte, hau da, 2.778 metro, bi luzetan banatuta eta ziaboga bakarrarekin.

Haien ostean, 12:15ean, jokatuko da Eusko Label Ligako gizonezkoen proba, Orio Kanpina XII. Bandera.  Hiru itsas-milia edo 5.556 metroko distantzia egin beharko dute, lau luzetan banatuta eta hiru ziabogarekin. Hiru txandatan ariko dira hamabi traineruak: Bermeo Urdaibai, Zierbena Bahias de Bizkaia, Orsa Hondarribia, Orio Orialki, Amenabar Donostia, Getaria, Ondarroa Kide, CR Cabo Da Cruz, Lekittarra Elecnor, Kaiku Beraz Galanta, San Pedro-Harri eta C.M. Bueu-Simei.

Zaleen Gunea Herriko Plazan jarriko da. Eusko Labeleko produktuak jateko eta Keler garagardoa edateko aukera izango da bertan eta, horrez gain, pantaila erraldoia jarriko da, estropada bertan ikusi ahal izateko.

Itzuli