Novas 2018
ESPECIAL
24 Ago 2018
Galiza pecha o telón da fase regular
Logo das dúas regatas da fin de semana coñeceranse os catro últimos postos da clasificación xeral
A Eusko Label Liga atópase xa na recta final, restan apenas catro regatas para o final da competición e dúas delas terán lugar esta fin de semana en Galiza. Moaña e Boiro recibirán un ano máis á elite do remo e dictarán sentenza no que se refire á parte baixa da clasificación.
O sábado a partir das 18:00 da tarde desputarase a XXXVI Bandeira Concello de Moaña – GP Fandicosta. Unha regata con formato de liña coas 12 embarcacións divididas en 3 quendas para realizar en catro longos con tres ceavogas un total de 3 millas náuticas. A orde de saída virá determinada pola clasificación xeral da Eusko Label Liga, polo que na primeira quenda participarán Tirán Pereira, San Juan Sumelec, Kaiku Producha e San Pedro. Na segunda quenda farano Ondarroa Cikautxo, Donostiarra, Cabo e Santurtzi Iberdrola. E por último, na quenda de honra vogarán Orio Babyauto, Zierbena Bahías de Bizkaia, GO fit Hondarribia e Urdaibai Avia.
O ano pasado esta bandeira levouna a Ama Guadalupekoa, que conta con dúas delas no seu palmarés. A Bou Bizkaia é quen máis veces se impuxo na Eusko Label Liga en Moaña, os de Bermeo teñen no seu haber 4 Bandeiras Concello de Moaña – GP Fandicosta. Verdes e azuis foron rotando no palmarés dende 2011, a excepción da edición de 2013 onde se impuxo a embarcación local de Tirán Pereira. O récord do campo de regatas osténtao Mecos, que no ano 2001 parou o crono no 18’54”76.
Domingo será a vez da XXVIII Bandeira Concello de Boiro. Onde no mesmo formato que o día anterior voltaranse ver as caras as doce embarcacións da elite do remo, desta vez, en augas de Cabo. A orde de saída tamén virá determinada pola clasificación xeral da Eusko Label Liga, tal e como indica a Normativa de Competición no seu artigo 11b.
Na edición do ano pasado, Urdaibai Avia foi a embarcación que se impuxo na Ría de Arousa, realizando ademais o mellor tempo rexistrado da Bandeira Concello de Boiro con 19’03”96. Os de Bermeo levaron a bandeira nos últimos dous anos e coa gañada no 2004 contan en total con 3 bandeiras no seu palmarés. As mesmas que GO fit Hondarribia que se impuxo na edición de 2015 e tamén nas de 2005 e 2006. A outra embarcación que conta cun bo historial en augas de Cabo é Orio Babyauto, que se impuxo no 2014 e 2007.
Tras esta regata, coñeceranse os postos definitivos dos últimos 4 postos da Eusko Label Liga. O último clasificado perderá a categoría, o penúltimo terá que desputar o Playoff de setembro canda os clubs convidados para tentaren continuar un ano máis na elite, e o décimo e o noveno darán por rematada por esta tempada a súa andaina na loita pola Coroa CaixaBank.
Polo tanto, moita cousa en xogo este fin de semana en Galiza. Vémonos na auga?